بسم الله الرحمن الرحيم ..
السلام عليكم .. كيفكم ؟ ..
اليوم أنا جايتكم بخصوص موضوع مهم وشفت كثير ناس متعقده وتتعب منه وتمرض ...!!
موضوع كبير ولابد نستوعبه ونفهمه زين .. .. أقرؤوه للأخر أرجوكم وأرفعوه عل الغير يستفيد ..
لاحظت كثير من الناس تتعب نفسيتها لما يحصلها امر يضايقها او مشكله او هم ..
وأنا هنا جايه أبيكم تحطون كلامي هذا حلق بأذانكم ..
إلى متى وأحنا نعلق أمنياتنا ومشاكلنا بالبشر .. ما نفعوا أنفسهم عشان ينفعوننا .. !!
ليه الطرق الملتوية في تحقيق الأمنيات ؟
ليه ما عندنا ثقه بربنا ؟
ليه نحزن وتصيبنا الأمراض وتظطرب قلوبنا من همومنا ومتناسين ان عندنا رب يدبر أمورنا في رمشة عين !!
حبيبتي :
لما تحزنين روحي لربك وارفعي يديك وربي العرش جل جلاله ماراح يردك .. والله الذي رفع السماء بلاعمد وثبت الأرض بلا وتد أنك لن تخيبي ..
ليتنا نعلم ونستوعب أن ربنا يرحم أنفسنا وقلوبنا أكثر من رحمتنا احنا لأنفسنا ..
ليه ما نثق بربنا ونشكوا له ..!
ربي ما يمل مننا مهما دعينا ..!
ربي يحب مناجاة عبده له ..!
ليه أحنا بعيدين عن ربنا ونجعله آخر الحلول ..!
أحنا عندنا كنز بس للأسف ما نستخدمه ..
أسألي نفسك قبل كل شيء ..
كيف علاقتي مع ربي !
وهنا مربط الفرس ..
..
خواتي أنا بأقولكم على أسرار لتحقيق أمنياتك كلها .. وأسرار تفرح قلبك وتزرع فيك السعاده ""
عندك أمنيه " وتشوفينها مستحيل تصير !
عندك هم وتبينه يزول من قلبك ..!
بنقاط بسيطه لما تسوينها .. أعدك أنك بتطيرين فرح وسعاده من تحقيق امنياتك ودفع همومك ..
تعالوا معاي نتعرف على هذي الأسرار اللي بتغير حياتك ..
ليه أحزن ويصيبني الهم والضيقه ..!
1/ ثقي أن الله ما ابتلاك الا لأنه يحبك ويبي يسمع مناجاتك له ..
2/ ربي يبي يطلع الايمان اللي بقلبك ويختبرك اذا اصابتك شده لمين تلجأين ..!
3/ انتظار الفرج عباده .. وبرضوه صبرك على حالك عباده .. وهذي أهم نقطه ( تذكري قول الله في الآيه : إن الله مع الصابرين )
إذا أصابتني شده وش أسوي ..!
1/ أذكري الله وقولي لنفسك هذا ابتلاء وخاطبي نفسك ( ربي يبي يمحي ذنوبي ويطهرني فالحمد الله على كل حال )
2/ أقرأي قرآن وركزي بالآيات ..حتى تطمئن نفسك .. وصدقيني بتجدين الآيات تخاطبك ..
في بالي أمنيه وأبيها تتحقق وأحسها مستحيله وصعبه .. وش أسوي ..!
هنا خليني أقولك ( إذا أنتي طرحتي لنفسك هذا السؤال معناه أن ثقتك بربي ماهي قويه ) دامك تقولين هذا صعب او هذا مستحيل صدقيني ماراح يتحقق لك شيء ..
ولاحظي انو الشخصيات الناجحه دائما .. ما تلقينهم ينطقون كلمة مستحيل ..
""
طيب إيش الحل ..!
الحل حبيبة قلبي : ربي أعطاك حلول .. ووعدك ووعده حق .. وتأملي معي وتلذذي بهذي الكلمات اللي ذكرهم ربي بكتابه :
( واذكروني أذكركم )
(ولإن شكرتم لأزيدنكم )
(أدعوني أستجب لكم )
(وماكان الله معذبهم وهم يستغفرون )
وتعالي شوفي الشروط اللي طلبها ربي منك وطبقيها ..
وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِي إِذَا دَعَانِي فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ
أخبرك ربي انه قريب منك كلميه متى شأتي .. وقولي اللي بقلبك وكل ما اهمك .. ربي ماراح يمل حتى تملي أنتي .. وتذكري الدعاء يدفع البلاء
وذكر ( أجيب دعوة الداعي إذا دعان ) اقسم بمن أحل القسم ربي ما يخيبك ولا يضيعك .. ربي يحبك ربي كريم .. يستحيي من الواحد يمد يده له ويردهم خايبه لابد يحط بيديك شيء .
والشرط هو ( فليستجيبوا لي وليمؤمنوا بي لعلهم يرشدون )..
إنتي أرضي ربك وسوي الأشياء اللي ترضيه ( أفعلي أوامره واجتنبي نواهيه ..
مثال :وبالمثال يتضح المقال ..
الان لما تعدين الطفل الصغير انك تودينه لمكان يحبه ( ملاهي" بقاله أو أي شيء ) وشهو شرطك له !
بتقولين : بشرط تكون شاطر وتسمع كلامي .. صح !
طيب هنا نفس الشيء وتعالى ربي علوا كبيرا سبحانه ..
استجيبي لله إذا أمرك حتى يحقق مرادك ..
ربي يحبك ويرحمك ويعرف اللي بقلبك بدون ما تقولين ..
ربي ملك الملوك يقدر على كل شيء ..
لكنه يبتليك لانه يمحص ذنوبك وحتى يذيقك حلاوة القرب منه ..
ليه لما الوحده تلجأء لربها وتدعيه بيقين .. تلاقينها ترتاح ! ( هي ذاقت حلاوة القرب بس ما تعرف تعبر عن هذا الشعور الا انها تقول انا مرتاحه )
لا تقولين ذنوبي كثير وأخاف ربي ما يستجيب لي ..!!
ربي استجاب لأبليس يوم قال: ( قَالَ رَبِّ فَأَنْظِرْنِي إِلَى يَوْمِ يُبْعَثُونَ * قَالَ فَإِنَّكَ مِنَ الْمُنْظَرِينَ * إِلَى يَوْمِ الْوَقْتِ الْمَعْلُومِ * قَالَ رَبِّ بِمَا أَغْوَيْتَنِي لَأُزَيِّنَنَّ لَهُمْ فِي الْأَرْضِ وَلَأُغْوِيَنَّهُمْ أَجْمَعِينَ * إِلَّا عِبَادَكَ مِنْهُمُ الْمُخْلَصِينَ * قَالَ هَذَا صِرَاطٌ عَلَيَّ مُسْتَقِيمٌ * إِنَّ عِبَادِي لَيْسَ لَكَ عَلَيْهِمْ سُلْطَانٌ إِلَّا مَنِ اتَّبَعَكَ مِنَ الْغَاوِينَ * وَإِنَّ جَهَنَّمَ لَمَوْعِدُهُمْ أَجْمَعِينَ * لَهَا سَبْعَةُ أَبْوَابٍ لِكُلِّ بَابٍ مِنْهُمْ جُزْءٌ مَقْسُومٌ (
وكيف ما يستجيب لك وانتي اللي آمنتي به وعظمتيه ..!!
ابليس حريص يخرب عليك عبادتك ويشكك بالله عز وجل ..
انتي استغفري واهلكيه بالاستغفار وبيقينك بربك .. خليك على يقين وثبات ان ربك ما يخليك .. ربك معاك ويعلم كل شيء ( والله يعلم وأنتم تعلمون )
الحلول لتحقيق أي شيء تبينه أعطاناها ربي بالقرآن ..
1/ الدعااااااااااااااااااااء
2/ ( واستعينو بالصبر والصلاة )
3/ استغفري بقد ما تقدرين واهلكي الشيطان واحذري يتزعزع هاليقين والايمان من قلبك .
4/ ارضي ربك بكل شيء ..
لا تقولين بأجرب .. لان وعود ربي ما تختبر لان ربي ما يقول الا الحق وهو الحق تبارك وتعالى ..
وتذكري اذا كنتي مع ربي واستجبتي له بالرخاء .. يستجيب لك وقت الشده ..
ولا تملين ولا تملين ولا تملين .. ورب البيت ما يمللك الا ابليس .. لانه شافك قريبه من ربي .. وبسبب قربك لربي ممكن ان الله يستجيب لك .. فهو يخرب عليك ..
(مو معناته ان ابليس عرف ان ربي استجاب دعائك فابليس ما يعرف الغيب ..
لكنه يبي يبعدك عن الله لان قربك من ربي سبب في ان ربي يستجيب دعائك ..
اياك تستجيبين لابليس .. )
وصيتي لك ياحبيبة قلبي :
( اجعلي بينك وبين الله حبل ما ينقطع ) أي شيء يصيبك لو هو صغير علطول تذكري اللي فوقك تراه يعلم خائنة الأعين وما تخفي الصدور ..
خلي لك موعد مع الله ما ينقطع ( صلاة الليل " قراءة القرآن" كثرة الذكر )
شوفي يعقوب يوم فقد ابنه كان عنده يقين بالله وما تزعزع ... لا تقولين هو نبي قولي انا يقين بالله قوي باذن الله ومافيه شيء بيهز قلبي دام اني متوكله على ربي ..
التوكل يابنات :هو حل جذري لكل مشاكلنا استخدموا ولا تستهينوا والله انا مجربه وهو أني أفوض أمري لله واكتفي باني أفعل الاسباب مع يقيني ان ربي ما يخيبني .. ( والاسباب :: اما تقديم على وضيفه او غير / وفيه اسباب سماويه ( الاستغفار والدعاء واللي قلتها قبل )
ولا تحزني أبدا دامك متوكله على ربك ليش تحزنيبن ..!
دامك عارفه ان اللي في السماء قادر يحقق لك رغباتك بحرفين ليه تحزنين !
طمني قلبك واضحكي واستانسي لان الله ربك .. وامنياتك راح تتحقق بس اصبري .. واياك تحتاجين لبشر .. ترا ورب البيت ما يقدرون على شيء الا اذا امرهم اللي بالسماء ..
الخلاصه :
انك تقدرين تحققين اللي بقلبك بنقاطه مهمه
الصلاة والدعاء
الاستغفار وكثرة الذكر
التوكل
الصدقه
العمل بالاسباب ..
هذي الاسباب كلها راح تيسر لك وانتي تقربي لله بأي شيء يحبه ..
لما تشوفين في الايه ( إن الله يحب ... ) شوفي وشو هو الامر وسويه .. اتفقنا
أنا متعمده إني ما اذكر أحاديث لاني أعرف ان الاغلب حفظ الأحاديث وعارفها وفاهمها .. أنا اللي ابي اوصله انك تكونين على يقين ان الله معاك وما راح يخيبك .. بس انتي اصبري ولا تقنطي من رحمة ربك مهما يكون ومهما طالت المده .. ثقي ان ربي ما اخرها الا عشان يفرح قلبك بشكل ما تتخيلينه .. ترا ربك كريم وما يعجزه شيء ..
طبقوا اللي قلته لكم وراح تعرفون اللذه في تحقيق الامنيات
أتمنى أكون وصلت اللي في بالي لكم .. واستفدتوا ..
فإن أصبت فمن الله وحده و أخطأت فمن نفسي والشيطان ...
ربي يحقق لكم أمنياتكم ويسعد قلوبكم وينور دروبكم ..
أذكروني بدعوه بظهر الغيب ..
ارفعوا الموضوع حتى يكتب الله أجوركم باذن الله ..
الثلاثاء أغسطس 06, 2024 11:58 am
